Bakıda Səbail rayonu ərazisində yerləşən “Location” gecə klubunda baş verən partlayışla bağlı üç nəfər həbs edilib. Bu haqda aprelin 4-də Baş Prokurorluq məlumat yayıb.
Toplanmış ilkin sübutlara əsasən, mətbəxdə qanunsuz olaraq propan qazının sıxılmış mayesi ilə dolu olan qaz balonundan istifadə edilib. Hadisəyə səbəb həmin qaz balonunun partlaması olub.
Belə ki, obyekti icarəyə götürmüş “Merser food” MMC-də administrator işləyən Rəsul Rəsulov “yanğın təhlükəsizliyi qaydalarını pozma” maddəsilə ittiham edilir. Həmin MMC-nin təsisçisi-klubun meneceri Orxan Səfərov isə səhlənkarlıqda təqsirləndirilir.
Qeyd edilən ərazi üzrə yanğın təhlükəsizliyinin təmin edilməsinə FHN-nin əməkdaşı Ruslan Məmmədov məsul idi. Onun tərəfindən vəzifələrin icrası zamanı səhlənkarlığa yol verilməsi müəyyən olunub. Qurumun nümayəndəsi də istintaqa cəlb edilib.
Hazırda cinayət işi üzrə istintaq davam etdirilir.
Sözügedən insident 3 aprel tarixində saat 03:00 radələrində baş verib. Ümumilikdə 1 nəfər vəfat edib, 37 nəfər isə xəsarət alıb. 14 avtomobil, 1 mənzil və 2 qeyri-yaşayış obyektinə ziyan dəyib.
