Bakıdakı “Location” gecə klubunda yaralanan vətəndaşların son durumu açıqlanıb. Ümumilikdə 37 nəfər xəsarət alıb. Bu haqda aprelin 4-də Səhiyyə Nazirliyi, İcbari Tibbi Sığorta və TƏBİB birgə məlumat yayıb.
Hazırda xəstəxanada 16 yaralı var. Onlardan 13-ü müalicəsini davam etdirir. Reanimasiyadakı 7 nəfərdən 3-nün vəziyyəti kritik qiymətləndirilir.
Stasionarda müalicə alan digər 5 nəfərin vəziyyəti stabil ağır, 4-nün vəziyyəti orta ağır olaraq dəyərləndirilir.
***
09:41
Bakıda Səbail rayonu ərazisində yerləşən "Location" gecə klubunda baş verən partlayışda ümumilikdə 31 nəfər xəsarət alıb, 1 nəfər vəfat edib. Bu haqda aprelin 3-də Səhiyyə Nazirliyi məlumat yayıb.
Reanimasiyada olan 7 nəfərdən 3-nün vəziyyəti kritik, 10-nun vəziyyəti orta ağır, 6 nəfərin isə stabil olaraq qiymətləndirilir. Digər yaralılar evə buraxılıb.
Zərərçəkmişlər arasında 2 nəfər xarici ölkə vətəndaşı olub. İtaliyalı qonaq üz çənə zədələnməsi diaqnozu ilə xəstəxanaya yatırılıb və vəziyyəti stabildir. Seneqal vətəndaşının vəziyyəti ağır olaraq dəyərləndirilir.
Qeyd edək ki, insident 3 aprel tarixində saat 03:00 radələrində baş verib. İlkin məlumata görə, hadisəyə səbəb obyektdə quraşdırılan qaz balonundakı sızma olub.
Faktla bağlı cinayət işi başlanılıb.
