Bakıda Səbail rayonu ərazisində yerləşən “Location” gecə klubunda baş verən partlayışda yaralanan Gülbala Abdullayev xəstəxanada vəfat edib. Bu haqda aprelin 9-da TƏBİB-in rəsmisi Zamirə Ədilova məlumat verib.
Onun sözlərinə görə, hazırda hadisə zamanı xəsarət alanlardan TƏBİB-in tabeli tibb müəssisələrində müalicə alan yoxdur. Qurumun nümayəndəsi bildirib ki, onlar bir neçə gün əvvəl Respublikada fəaliyyət göstərən özəl tibb müəssisələrinə köçürülüb.
Qeyd edək ki, insident 3 aprel tarixində saat 03:00 radələrində baş verib. İlkin məlumata görə, hadisəyə səbəb obyektdə quraşdırılan qaz balonundakı sızma olub. İnsidentdə ümumilikdə 37 nəfər müxtəlif dərəcəli bədən xəsarəti alıb, 3 nəfər isə həyatını itirib.
