Bugün səhər saatlarında Bakı-Ələt yolunda bir-birinin ardınca müxtəlif ərazilərdə iki yol qəzası qeydə alınıb. Nəticədə 8 nəfər xəsarət alıb. Bu haqda 5 yanvar tarixində APA məlumat yayıb.
Baş verən ilk qəza nəticəsində xəsarət alan 5 nəfər Kliniki Tibbi Mərkəzə gətirilib. Yaralılardan biri reanimasiya şöbəsinə yerləşdirilib, birinin müalicəsi davam edir, digərlərinə isə ilkin tibbi yardım göstərilərək, evə buraxılıb.
Bundan bir qədər sonra ikinci qəza baş verib. Xəsarət alan 3 nəfər Mərkəzə yerləşdirilib. Onlardan ikisi Türkiyə vətəndaşı olub. Vəziyyətləri kafidir.
Sözügedən yolda dekabrın 18-də də analoji hadisə qeydə alınmışdır. Mikroavtobusla minik maşınının toqquşması nəticəsində ikisi azyaşlı olmaqla doqquz nəfər yaralanmışdır.
Cari ilin 11 ayı ərzində Bakıda 458 yol-nəqliyyat hadisəsi olub. 191 nəfər həyatını itirib, 365 nəfər isə yaralanıb.
