Bakıda 35, 87 və 263 nömrəli tam orta məktəblər sökülərək yenidən tikilir, bir sıra ümumi təhsil müəssisəsində isə zəruri təmir işləri davam etdirilir. Bu barədə dekabrın 17-də Trend Bakı Şəhəri üzrə Təhsil İdarəsinə istinadən xəbər yayıb.
Bildirilib ki, hər il təmirə ehtiyacı olan məktəblərin siyahısı müəyyənləşdirilərək aidiyyəti orqana göndərilir.
“Bütün bunlar məktəblərin müasir tələblər səviyyəsinə çatdırılması və tədris ocaqlarının maddi-texniki bazasının gücləndirilməsi istiqamətində səmərəli işlərin davam etdirilməsinə imkan verir”, - deyə məlumatda qeyd olunub.
Təhsil nazirinin müavini Firudin Qurbanovun sözlərinə görə, Azərbaycanda 400-ə yaxın məktəbin təmirə və yenidənqurma işlərinə ehtiyacı var. O əlavə edib ki, son 15 ildə 4400 məktəbdən 3500-dən çoxu yenidən qurulub və əsaslı təmir olunub.
