2022-ci ildən etibarən Bakı-Türkmənbaşı-Bakı istiqamətində iki gəmi fəaliyyət göstərəcək. Bu addım “Asiya və Sakit okean regionu-Çin-Qırğızıstan-Özbəkistan-Türkmənistan-Azərbaycan-Gürcüstan-Türkiyə-Avropa nəqliyyat marşrutu”nun gücləndirilməsi məqsədilə atılıb. Bu haqda 31 yanvarda “ADY Konteyner” MMC-nin saytında məlumat verilib.
Belə ki, konteynerlərin daşınmasını “Şair Sabir” və “Mahmud Rəhimov” gəmiləri həyata keçirəcək. Gəmilərin sayı ilə yanaşı, həftəlik reyslərin də sayı 2 dəfəyə çatdırılacaq.
Sözügedən limanlar arasında ilk gəmi 2019-cu ilin aprel ayında fəaliyyətə başlayıb. Bu günədək marşrut üzrə 17 500 konteyner daşınıb. Yükdaşımaların həcmi 2021-ci ildə 2020-ci illə müqayisədə 101% artıb.
