Bakı-Tbilisi-Ceyhan (BTC) ixrac boru kəməri ilə Ceyhan terminalına 500 milyon ton neft nəql edilib. Bu barədə 13 dekabr tarixində BP-nin rəsmi səhifəsində deyilir.
Məlumata görə, Xəzər neftinin 500 milyonuncu tonu 12 dekabr tarixində “Nordorse” adlı və sayca 4922-ci olan tankerə yüklənərək İtaliyaya yola salınıb. BTC-nin səmərəliliyi və istismar etibarlılığı ilk dövrlərdəki 75%-dən artaraq hazırkı 99,9% səviyyəsinə çatıb.
BP-nin Azərbaycan, Gürcüstan və Türkiyə üzrə regional prezidenti Qəri Counzun sözlərinə görə, uzun müddət keçməsinə baxmayaraq BTC qapalı Xəzər hövzəsi ilə dünya bazarlarına asan çıxışı olan Aralıq dənizi arasında birbaşa strateji əlaqə yaratmaqla regionun əsas enerji ixrac arteriyası olmaqda davam edir. “BTC həqiqətən də hər mənada möhtəşəm bir ixrac sistemidir və onun əldə etdiyi nailiyyətlər bizdə qürur hissi oyadır. Bu dünya səviyyəli kəmərin üç ölkə boyunca gecə-gündüz təhlükəsiz və sakit fəaliyyət göstərməsi üçün çalışan bütün insanlara çox təşəkkür edirəm. Mən həmçinin göstərdikləri dəstəyə və uğurlu əməkdaşlığa görə BTC-nin səhmdarlarına da öz minnətdarlığımı bildirirəm”, - deyə şirkət rəsmisi əlavə edib.
BTC xam nefti Ceyhan terminalında ilk tankerə 2006-cı ildə yüklənib. Boru kəmərin uzunluğu 1 768 kilometr, cari ötürücülük gücü isə gündəlik 1,2 milyon barel təşkil edir.
