Bu gün, yanvarın 12-də Gürcüstanın Batumi şəhərində yeddimərtəbəli yaşayış binasının bir hissəsində baş verən uçquna görə həbs olunan Azərbaycan vətəndaşı Zaur Budaqov və daha 2 nəfərin məhkəməsi başlayıb. Bu barədə Report məlumat paylaşıb.
Batumi Şəhər Məhkəməsinə sübutlar təqdim ediləcək. Həmçinin həbs olunan şəxslərin girov müqabilində azadlığa buraxılması ilə bağlı vəsatət qaldırılacaq. Həlak olmuş şəxslərin qohumları ittiham olunanların həbsini tələb edirlər.
Saxlanılan şəxslər tikintidə təhlükəsizlik qaydalarını pozaraq insan itkisinə və ağır nəticələrə səbəb olmaqda ittiham olunurlar. Sözügedən şəxslərin günahı sübuta yetirilərsə, onları 2 ildən 5 ilədək həbs gözləyir.
Gürcüstanın ikinci ən böyük şəhəri olan Batumidə yaşayış binasının bir bloku 2021-ci ilin 8 oktyabr tarixində çöküb. Buna səbəb birinci mərtəbədə Z.Budaqova məxsus olan mənzildə dayaq divarının sökülməsi olub. Nəticədə 3-ü uşaq olmaqla 9 nəfər həlak olub.
Bu səbəbdən oktyabrın 11-i qonşu ölkədə həlak olan vətəndaşların xatirəsinə matəm günü elan olunub.
