"Yeni il" bayramı ilə əlaqədar Azərbaycanda 2021-ci il dekabrın 31-dən yanvarın 5-dək qeyri-iş günləri olacaq. Bu beş günü necə keçirmək olar? Bu barədə İnsanoid araşdırma aparıb.
Şahdağ və ya Tufandağa bir günlük tur ortalama 50 manata başa gəlir. Bu qiymətə kanat yolları, macəra parkı, kvadrasikl və xizək kirayəsi daxildir.
Rayonlarda dincəlmək istəyənlər isə avtovağzalın kassalarından biletləri ala bilərlər. Belə ki, Bakı - Quba marşrutunun qiyməti 4 manat, Bakı - Zaqatala 10 manat, Bakı - Gədəbəy 10,4 manat təşkil edir. Bölgələrə bir günlük turların ortalama qiyməti 23-25 manatdan, iki günlük turların qiyməti isə 75 manatdan başlayır. Bura nəqliyyat, qidalanma, hoteldə qalma kimi xidmətlər daxildir.
Azərbaycanda ilk dəfə “Şaxta Babanın evi” əyləncə məkanı açılıb. Şou-proqramlar 10 dekabrdan - 15 yanvaradək Red Cup Baku-da keçiriləcək. Tədbirin qiyməti 17-120 manat arasında dəyişir.
Bakı Konqres Mərkəzində 25 dekabrdan 5 yanvar tarixinədək “Cırtdan: Böyük Macəra” meqa-şousu keçiriləcək. Biletlərin qiymətləri 6-36 manat civarındadır.
Opera və Balet Teatrında 26 dekabr (15:00), 30 dekabr (19:00), 5 yanvar (19:00) “Şelkunçik” tamaşası baş tutacaq. Biletin qiyməti 26 dekabr 8 manat, dekabrın 30-u və yanvarın 5-i isə 16 manatdır.
Bununla yanaşı, Bakıda 17 dekabrdan 9 yanvaradək Sirkdə Yeni il Macərası keçiriləcək. Biletlərin qiyməti 11 - 27 manatdır.
Dekabrın 13-dən ölkədə hamamlar da fəaliyyətə başlayıb. Yerli SPA salonlarında müştərilərə əsasən masaj, hamam, sauna və cakuzi xidmətləri təklif olunur. Qiymətlər 30 manatdan başlayır.
Qeyd edək ki, ölkədə 18 yaşdan yuxarı şəxslər hər iki doza olmaqla vaksin sertifikatı, immunitet sertifikatı və ya əks-göstəriş sertifikatı təqdim etməklə ictimai yerlərə daxil ola bilərlər.
