Ölkədə bir ay bundan öncə kiloqramı 50-55 qəpiyə olan soğan hazırda 1,30 manata satılır. Kiloqramı 1 manatdan satılan kartofun qiyməti isə 1,70 manata qalxıb. Bazarlardakı bu qiymət artımı ilə bağlı aprelin 5-də Report araşdırma aparıb.
"Qarabağ-Aran Soğan İstehsalçıları və İxracatçıları Assosiasiyası” İctimai Birliyinin sədri Vüqar Babayev soğanın bahalaşmasını istehsalda maya dəyərinə çəkilən xərclə əsaslandırıb.
“Soğanın saxlama kameralarına çəkilən xərclər artıb, dünya bazarlarında gübrələrin qiyməti kəskin artıb. Elə gübrələr var ki, qiymət artımı yüz faizdir. 2021-ci ildə ölkədə enerjinin qiymətinin artması da istehsalımıza təsir göstərib”, - deyə sədr bildirib.
O, həmçinin qeyd edib ki, daha öncə ölkəyə Rusiyadan, Ukraynadan, Türkiyədən və Pakistandan ucuz qiymətə soğan gətirilirdisə, indi idxal dayanıb.
Lakin V.Babayevin sözlərinə görə, bu ay soğanın qiymətinin azalması gözlənilir : “Ramazan ayına görə hazırda toy şənliklərinin sayı kəskin azalıb. Bu da soğan istehlakına təsir göstərir”.
Kənd Təsərrüfatı Nazirliyinin Aqrar Tədqiqatlar Mərkəzinin Analitika departamentinin müdiri Səadət Hacıyeva kartofun qiymətinin artmasını region ölkələrinin bazarlarındakı dəyişikliklə əlaqələndirib. Eyni zamanda, o bildirib ki, aprelin 10-dan sonra təzə kartof və təzə soğan bazara çıxacaq və du da həcmdə artıma səbəb olacaq.
Qeyd edək ki, Azərbaycanda soğana illik tələbat 240 min ton təşkil edir. Bu məhsulun özünütəminetmə göstəricisi 100%-dən çoxdur. Kartofa isə illik tələbat 800-840 min ton təşkil edir. Ölkəmizdə sözügedən tərəvəzin istehsalı illik tələbatın 90%-ni ödəyir. Qalan 10% isə xaricdən idxal olunur.
