Biləsuvarın Nəsimikənd kəndində içməli su problemi yaranıb.Bu barədə martın 9-da Report-a sözügedən kəndin sakinləri məlumat veriblər.
Kənd sakinləri bildiriblər ki, kənd ərazisindən keçən su kanalında su olsa da, əhali bu sudan yalnız kənd təsərrüfatı sahələrində, mal-qaranın suvarılmasında və texniki məqsədlər üçün istifadə edir: “Kanalın keçdiyi ərazilərdə yerli əhali məişət tullantılarını kanala atdığı üçün çirklənmə həddindən artıq çoxdur”.
Əhalisi 4 000-ə yaxın olan kəndin sakinləri içməli suyu yalnız marketlərdən və həftədə bir dəfə kəndə gələn su maşınlarından ödəniş etməklə alırlar.
Problemlə əlaqədar olaraq Biləsuvar Su Kanalı Sahəsinin rəisi bildirib ki, əhalini içməli su ilə təmin etmək məqsədilə modul tipli su qurğusu quraşdırılıb: “Kənddə 22 bulaq inşa edilib. Hazırda kənd sakinləri gün ərzində 12 saat fasiləsiz içməli su ilə təmin edilir”.
