Rusiyada azərbaycanlı iş adamı Telman İsmayılova qarşı daha bir cinayət işi açılıb. O, qəsdən özünü müflis elan etməkdə təqsirləndirilir. Bu haqda noyabrın 17-də Kommersant Rusiya DİN-ə istinadən məlumat yayıb.
Yeni cinayət işi bankın şikayəti əsasında başlanılıb. Biznesmenə məxsus “Ruslayn 2000” ASC BM-bankından 185 milyon dollardan çox kredit götürüb. Daha sonra bank və keçmiş oliqarx arasında şəxsi zaminlik müqaviləsi bağlanıb. Telman İsmayılov borcunu 1 aprel 2016-ci ilə qədər ödəməli idi.
Qeyd edilir ki, o, bir neçə aydan sonra nəvəsinə Moskavada yerləşən iki mənzil hədiyyə edib. Polisin məlumatına görə, 2015-ci ildə iş adamı Naro-Fominsk şəhəri yaxınlığında dəyəri 336 milyon rubl olan 4 torpaq sahəsini və 2 yaşayış binasını özgəninkiləşdirib.
"Nəticədə İsmayılov qəsdən kreditorların tələblərini tam təmin edə bilməməsinə səbəb olan şərait yaradıb", - deyə mətbuat xidməti vurğulayıb.
Çerkizov bazarının keçmiş sahibi 2017-ci ilin martında rəsmən müflis elan edilmişdir. Sözügedən şəxs oktyabrın 1-də Rusiyanın təqdim etdiyi order əsasında Monteneqroda saxlanılmışdır. O, iki biznesmen Vladimir Savkin və Yuri Brıyolevun qətlini təşkil etməkdə, həmçinin qanunsuz silah alverində ittiham olunmuşdur. Oktyabrın 23-də isə Monteneqro hökuməti azərbaycanlı iş adamına siyasi sığınacaq vermişdir.
