BMT Prezident İlham Əliyevin təşəbbüsü ilə irəli sürülən "COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi" adlı qətnaməni qəbul edib. Bu haqda noyabrın 19-da Xarici İşlər Nazirliyi məlumat yayıb.
Bildirilib ki, BMT-yə üzv olan 126 ölkə qətnamənin həmmüəllifi olub. Qətnamədə inkişaf etmiş və inkişaf etməkdə olan ölkələr arasında koronavirusa qarşı peyvəndlərin bölgüsündə mövcud olan bərabərsizlikdən bəhs edilir. Bunun Dayanıqlı İnkişaf Məqsədlərinin həyata keçirilməsinə mane olan əsas amillərdən biri olduğu vurğulanır.
Bütün dövlətlər COVID-19 əleyhinə peyvəndlərin ixracı ilə bağlı maneələri aradan qaldırmağa çağırılır. Əlavə olaraq ölkələr peyvəndlərin hazırlanması və paylanması sahəsində əməkdaşlığa dəvət olunur.
