Bu gün Biləsuvar Rayon İcra Hakimiyyətinin keçmiş başçısı Mahir Quliyevin cinayət işi üzrə məhkəmə iclası keçirilib. O, özünü təqsirli bilməyib. Bu haqda yanvarın 31-də Report məlumat yayıb.
Prosesdə prokuror ittiham aktını elan edib. Daha sonra 22 şahid epizodlar üzrə ifadə veriblər. Onlar məhkəmənin, prokurorun və müdafiəçinin suallarını cavablandırıblar. Növbəti iclas fevralın 7-nə təyin edilib.
Biləsuvarın sabiq başçısı Dövlət Təhlükəsizliyi Xidməti tərəfindən 2020-ci il aprelin 29-da saxlanılıb. O, “mənimsəmə və ya israf etmə”, “vəzifə səlahiyyətlərindən sui-istifadə etmə”, “təkrar rüşvət alma” və “vəzifə saxtakarlığı” maddələri ilə ittiham olunur.
Qeyd edək ki, sözügedən şəxs ötən ilin sentyabrında koronavirusa yoluxmuşdur. Buna görə onun məhkəmə prosesi bir müddət təxirə salınmışdır.
