Dekabrın 31-də dünyaşöhrətli kimyaçı alim, kimya elmləri doktoru, Dövlət Mükafatı laureatı, akademik Yusif Məmmədəliyevin doğum günüdür. O, dünyada ilk dəfə Azərbaycan nefti və təbii qazlarının tədqiqinə başlayıb, onların kimyəvi tərkibinin müəyyənləşdirilməsində uğurlu nailiyyətlər qazanıb.
Akademikin elmi axtarışları böyük ixtiralara, yeni elmi konsepsiyaların yaranmasına gətirib çıxarıb, Azərbaycan və dünya elminə böyük töhfələr verib.
Məmmədəliyev etil spirtinin, süni kauçukun, süni liflərin yeni alınma üsullarını işləyib hazırlayıb. Bu metod ilə Azərbaycanda ilk dəfə süni kauçukun istehsalına başlanılıb.
O, ilk dəfə neft qazlarının müxtəlif üsullarla ayrılması, xlorlaşması, etilen və asetilenə çevrilməsi, doymamış qazların bromlaşmasını xalq təsərrüfatında və tibbdə istifadə olunmasına dair müvəffəqiyyətli tədqiqat işləri aparıb.
Dünya alimlərinin öhdəsindən gələ bilmədiyi “qaynar lay” katalizator təbəqəsini tətbiq etməklə halogenləşmə proseslərində inqilabi dönüş yarada bilib.
1938-ci ildə Moskva Dövlət Universitetinin ona dissertasiya müdafiə etmədən kimya elmləri namizədi alimlik dərəcəsi verib.
Misilsiz və əvəzsiz xidmətlərinə görə Yusif Məmmədəliyev Azərbaycanın ilk kimyaçı akademiki, Bakı Dövlət Universiteti rektoru, iki dəfə Azərbaycan Milli Elmlər Akademiyasının prezidenti olub.
