Azərbaycanın görkəmli siyasi və dövlət xadimi, Azərbaycan Xalq Cümhuriyyətinin banilərindən biri Məhəmməd Əmin Rəsulzadə 31 yanvar 1884-cü ildə Bakının Novxanı kəndində anadan olub.
O, 1904-cü ildə “Hümmət” təşkilatının yaradılmasında iştirak edib. 1908-ci ildə M.Ə.Rəsulzadə çar Rusiyası tərəfindən onun həbs olunması təhlükəsi ilə əlaqədar Bakını tərk edərək İrana gedir. O, 1910-cu ildə İran Demokrat Partiyasının əsasını qoyur, “İrane Nou” və “İrane Ahat” qəzetlərinin baş redaktoru olur.
1917-ci ilin payızında M.Ə.Rəsulzadə Rusiya parlamentinə Azərbaycan və Türküstandan millət vəkili seçilib, həmin il Müsavat Partiyasının sədri olub. 27 may 1918-ci ildə Azərbaycan Milli Şurası yaradılıb və səs çoxluğu ilə M.Ə.Rəsulzadə onun sədri seçilib. Şuranın ilk iclasında, 28 mayda Fətəlixan Xoyskinin başçılığı ilə Azərbaycan Demokratik Respublikası hökuməti yaradılıb.
28 aprel 1920-ci ildə, sovet işğalından sonra Rəsulzadə həbs edilir, lakin İosif Stalinin göstərişi ilə həbsdən azad olunur və Azərbaycanı tərk edir.
1932-ci ildən M.Ə.Rəsulzadənin fəaliyyətinin Avropa dövrü başlayır. Bu illərdə o, Almaniyada “İstiqlal” qəzetini, “Qurtuluş” jurnalını nəşr etdirir, Polşada isə milli Azərbaycan nəşriyyatını yaradıb polyak dilində “Azərbaycan müstəqillik uğrunda mübarizədə” kitabını çap etdirir.
Məhəmməd Əmin Rəsulzadə 6 mart 1955-ci ildə Ankarada vəfat edib və oranın “Əsri” qəbiristanlığında dəfn olunub.
Deyilənə görə, M.Ə.Rəsulzadə 71 yaşında dünyadan köçərkən son olaraq üç dəfə “Azərbaycan, Azərbaycan, Azərbaycan!” sözlərini deyib.
