Mir Cəlal Əli oğlu Paşayev 26 aprel 1908-ci ildə Cənubi Azərbaycanın Əndəbil kəndində anadan olub.
O, uşaq yaşlarında ailəsi ilə Gəncəyə köçüb. Mir Cəlal Paşayev 1918-1919-cu illərdə Gəncə Xeyriyyə cəmiyyətinin ibtidai məktəbində, 1924-1927-ci illərdə Gəncə Türk Pedaqoji Texnikumunda təhsil alıb. O, 1930-1932-ci illərdə Kazan Şərq Pedaqoji İnstitutunun dil-әdәbiyyat fakültəsində, 1932-1935-ci illərdə Azərbaycan Dövlət Elmi-Tədqiqat İnstitutunun aspiranturasında təhsil alıb.
Yazıçının “Boy”, “Bostan oğrusu”, “Gözün aydın”, “İsrafil” və başqa kitabları çap edilib. O, “Dirilən adam”, “Bir gəncin manifesti” kimi romanların, “Badam ağacları”, “Ərəb qızı” və s. hekayələrin müəllifidir.
Mir Cəlal Paşayev “əməkdar elm xadimi” adına layiq görülüb, “Qabaqcıl maarif xadimi” döş nişanı və bir çox medal, fəxri fərmanlarla təltif olunub.
Mir Cəlal Paşayev 28 sentyabr 1978-ci ildə vəfat edib və Bakıda İkinci Fəxri xiyabanda dəfn olunub.
