Ramazan ayı müsəlmanlar üçün 623-cü ildə müəyyən edilib.
Ramazan ayı müqəddəs ay hesab edilir. Buna səbəb bu ayın gecələrinin birində Qurani-Kərimin nazil olmasıdır. Həmin gecəyə “qədr” və ya “əhya” gecəsi deyilir.
Bu ay müsəlmanlara oruc tutmaq vacib edilib. Orucluq səmada yeni Аyın göründüyü andan başlanır və 29-30 gün davam edir. Ramazan Fitr bayramı ilə başa çatır. Həmin gün imkanı olan hər kəs fəqirlərə “fitrə” adlanan ərzaq yardımı edir.
Sovet dövründə İslamın digər ayin və ibadətləri kimi, oruc tutmaq da qadağan edilmişdi. Lakin imanlı adamlar gizli də olsa, öz şəriət vəzifələrini yerinə yetirirdilər.
Azərbaycan müstəqilliyini bərpa etdikdən sonra Ramazan bayramı Milli Məclisin qəbul etdiyi 1992-ci il 27 oktyabr tarixli “Azərbaycan Respublikasının bayramları haqqında” Qanununa əsasən dövlət səviyyəsində qeyd olunmağa başlandı.
Bu gün, mayın 2-də Əjdərbəy məscidi və ya Göy məscid kimi şəhərin əsas məscidlərində bayram namazı saat 09:00-da, Təzə Pir məscidində isə saat 10:00-da qılınacaq.
