Bu gün, aprelin 29-da Bolqarıstanın paytaxtı Sofiya şəhərində keçiriləcək cüdo üzrə Avropa çempionatına start veriləcək. Turnirin ilk günündə ölkəmizi 6 cüdoçu təmsil edəcək.
60 kq çəki dərəcəsində çıxış edən Balabəy Ağayev 1/16 final mərhələsində Yunanıstan idmançısı ilə, eyni çəkidəki Əhməd Yusifov isə İspaniya cüdoçusu ilə üz-üzə gələcək.
66 kq-da yarışan Yaşar Nəcəfov 1/16 finalda moldovalı, İbrahim Əliyev isə israilli idmançı ilə qarşılaşacaq.
Qadınlardan 48 kq çəki dərəcəsində Şəfəq Həmidova 1/8 final mərhələsində İspaniya, Ramilə Əliyeva isə Portuqaliya idmançısını məğlub etməyə çalışacaq.
Qeyd edək ki, Azərbaycanı Avropa çempionatında 11 cüdoçu təmsil edəcək. Turnir mayın 1-dək davam edəcək. Yarışda 40 ölkədən 361 idmançı iştirak edəcək.
