Bu gün, aprelin 23-də “Parni iz Baku” komandasının kapitanı, millət vəkili Anar Məmmədxanovun anım günüdür. Onun vəfatından 11 il ötür.
Anar Camal oğlu Məmmədxanov 20 iyul 1970-ci ildə Bakıda anadan olub. O, 160 saylı məktəbdə, daha sonra isə Azərbaycan Dövlət Universitetinin mexanika-riyaziyyat fakültəsində təhsil alıb.
İctimai xadim 1992, 1993, 1995-ci illərdə Şən və Hazırcavablar Klubları arasında MDB çempionu, 2000-ci ildə XX əsr çempionu olub. Məmmədxanov, həmçinin Bakı Şən və Hazırcavablar Klubunun prezidenti vəzifəsində çalışıb. O, üç dəfə - 1995-ci ildə 19 saylı I Suraxanı dairəsindən, 2000 və 2005-ci ildə müstəqil namizəd kimi Milli Məclisə deputat seçilib.
Qeyd edilənlərlə yanaşı, sözügedən şəxs "Ultra Production" şirkətinin və "Day.az" xəbər saytının da yaradıcısı olub.
Deputat 23 aprel 2011-ci ildə ürək tutmasından dünyasını dəyişib. Anar Məmmədxanov evli olub, onun üç övladı var.
