Bu gün, yanvarın 11-də şahmat üzrə üçqat Azərbaycan çempionu adına layiq görülmüş Vüqar Həşimovun anım günüdür.
Qrossmeyster 24 iyul 1986-cı ildə Bakıda anadan olub. O, karyerası ərzində 2002, 2004, 2006 və 2008-ci illərin Şahmat Olimpiadalarında Azərbaycan yığmasının tərkibində çıxış edib. Həşimov 2009-cu ildə Azərbaycan yığmasının heyətində Avropa Çempionu adını qazanıb.
Şahmatçı 2011-ci ilin yanvarında İtaliyada Recco-Emiliya turnirinin qalibi olub. Həmin il Vüqar Həşimov FİDE-nin 2011-ci ilin mart ayına olan reytinq siyahısında Teymur Rəcəbovu bir pillə qabaqlayaraq 11-ci yerdə qərarlaşıb.
O, 2014-cü ildə 27 yaşında beyin xərçəngindən müalicə olunduğu Almaniya klinikasında dünyasını dəyişib.
2014-cü ilin aprel ayında, Şəmkirdə mərhumun xatirəsinə həsr olunmuş beynəlxalq şahmat turniri təşkil edilib. Turnirdə Maqnus Karlsen, Fabiano Karuana, Şəhriyar Məmmədyarov, Teymur Rəcəbov, Sergey Karyakin, Hikaru Nakamura, Etiyen Bakrot, Vang Hao və digər şahmatçılar iştirak edib. Bu yarışma indiyədək keçirilməyə davam edir.
2016-cı ildə isə Bakıda Qrosmeyster Vüqar Həşimov Şahmat Akademiyası fəaliyyətə başlayıb.
