2022-ci ildə Quba, Qusar, Xaçmaz, Şəki, Zaqatala, Qax, Lənkəran, Astara və Lerik rayonlarında kənd turizmi sahəsində daha 50 sahibkarlıq subyekti yaradılacaq. Bu barədə 10 yanvar tarixində Kiçik və Orta Biznesin İnkişafı Agentliyi məlumat verib.
“Kəndlərdə sahibkarlığın və özünüməşğulluğun inkişafı” layihəsinə müraciət edən namizədlər seçildikdən sonra turizm və xidmət sahələri üzrə təlimlərə cəlb olunacaqlar. Həmçinin turizm obyekti kimi istifadə olunacaq ərazidə təmir işləri aparılacaq və lazımi avadanlıqlarla təchiz ediləcəkdir.
Sözügedən rayonlarda kənd turizmi ilə məşğul olmaq istəyən şəxslər yanvarın 28-dək qeydiyyatdan keçərək müraciət edə bilərlər.
Layihənin məqsədi turizmin inkişafı, yeni sahibkarlıq subyektlərinin yaradılması və əhalinin özünüməşğulluğunun təmin edilməsidir.
Bundan öncə İsmayıllıda 15 kənd qonaq evi yaradılıb, 300 nəfərə yaxın kənd sakini sahibkarlıq və özünüməşğulluq imkanları barədə məlumatlandırılıb.
