Bugün Azərbaycanın 2 Milli Qəhrəmanı - Muxtar Qasımov və Eldar Məmmədovun doğum günüdür.
Qasımov Muxtar Cahid oğlu 10 yanvar 1958-ci ildə Beyləqan rayonunun Kəbirli kəndində anadan olub. O, Ağdam şəhər 5 saylı məktəbi 1974-cü ildə bitirib və həmin il Dövlət Tibb İnstitutuna daxil olub. Muxtar tibb təhsilini başa vurduqdan sonra işləmək üçün təyinatla Xankəndinə yola düşüb.
Müxtəlif təzyiqlərə, ermənilərin separatizminə rəğmən həkim insanlara tibbi yardım göstərməyə davam edib. 1988-ci ildə baş verən qarşıdurmalar nəticəsində o, Ağdama qayıdıb və hospitalda çalışaraq döyüşlərdə yaralıları xilas edib. Xocalı faciəsindən sonra isə Qasımov həyatını tamamilə cəbhəyə bağlayıb.
Həkim 1992-ci ilin iyun ayında Aranzəmin, Pircamal, Ağbulaq kəndlərinin azad edilməsi uğrunda gedən döyüşlərdə öz bacarığını nümayiş etdirib. O, 16 iyun 1992-ci ildə Naxçıvanlı kəndi uğrunda gedən döyüşlərdə xidməti vəzifəsini yerinə yetirərkən həlak olub.
Azərbaycan Prezidentinin 5 fevral 1993-cü il tarixli fərmanı ilə Muxtar Qasımov ölümündən sonra "Azərbaycanın Milli Qəhrəmanı" adına layiq görülüb. O, Bakı şəhərinin Şəhidlər Xiyabanında dəfn edilib.
Eldar Harun oğlu Məmmədov 1968-ci il 10 yanvar tarixində Bakıda doğulub. O, Cəmşid Naxçıvanski adına hərbi məktəbi bitirdikdən sonra 1985-1989-cu illərdə Riqa Ali Hərbi Siyasi Məktəbində təhsil alıb. Məktəbi bitirdikdən sonra Eldar Rusiyanın Orenburq vilayətində zabit kimi xidmətdə olub.
Hərbçi Azərbaycana qayıtdıqdan sonra əvvəl raket qoşunlarında, sonra isə Milli Təhlükəsizlik Nazirliyi Sərhəd Qoşunları Baş İdarəsində çalışıb.
Eldar Məmmədov 1993-cü il 24 fevral tarixində Ağdərədə gedən döyüşlərdə şəhid olub. Dövlət başçısı Heydər Əliyevin 11 dekabr 1994-cü il tarixli fərmani ilə o, "Azərbaycan Milli Qəhrəmanı" adına layiq görülüb. Dövlət Sərhəd Xidmətinin Göytəpə Sərhəd Dəstəsinin 2-ci alayı şəhidin adını daşıyır.
