Bugün Azərbaycanın Milli Qəhrəmanı, ilk şəhid qadın jurnalisti, “Azərbaycan gəncləri” qəzetinin müxbiri olmuş Salatın Əziz qızı Əsgərovanın doğum günüdür. Media nümayəndəsi 16 dekabr 1961-ci ildə Bakıda ziyalı ailəsində anadan olub.
O, 1979-cu ildə Bakı şəhəri Mikayıl Müşfiq adına 18 saylı orta məktəbi bitirib, həmin il Azərbaycan Neft və Kimya İnstitutuna (indiki ADNSU) daxil olub. Salatın Əsgərova mühəndislik fakültəsini bitirsə də, jurnalist kimi fəaliyyət göstərib. Media nümayəndəsi 1984-cü ildə “Bakı” qəzetində, dörd il sonra isə “Azərbaycan gəncləri” qəzetində işləyib. Qəzetin əməkdaşı kimi Birinci Qarabağ müharibəsinin ilk günlərindən hərbi mövzuda yazılar hazırlayıb, tez-tez cəbhənin qaynar nöqtələrindən məlumat verib.
9 yanvar 1991-ci ildə jurnalist Laçından Şuşaya yollanarkən, onun olduğu avtomobil Qaladərəsi kəndi yaxınlığında ermənilər tərəfindən atəşə tutulub. Daha sonra ermənilər avtomobilin qapısını açıb, yaralı qadını dayanmadan güllələyiblər. Media nümayəndəsi elə orada dünyasını dəyişib. Hazırda onun şəhid olduğu Şuşa rayonunun kəndi Salatınkənd adlanır.
Salatın Əsgərova Bakıda Şəhidlər Xiyabanında dəfn olunub. 1992-ci ildə ona “Azərbaycanın Milli Qəhrəmanı” adı verilib. Bakı şəhərində küçə, Bakı buxtasındakı gəzinti katerlərindən biri onun adını daşıyır. Təfəkkür Universitetində jurnalistin büstü qoyulub, yaşadığı binaya isə barelyefi vurulub.
