Dekabrın 28-də Astara, İsmayıllı və Şəkidə yaşayış evlərində, Bakıda isə şüşə sexində yanğın baş verib. Bu barədə Fövqəladə Hallar Nazirliyi məlumat verib.
Məlumata əsasən, İsmayıllı rayonunda ümumi sahəsi 200 m² olan ikimərtəbəli evin dam örtüyünün yanar konstruksiyaları yanıb.
Rayonun İvanovka kəndində isə ümumi sahəsi 88 m² olan kürsülü, beş otaqlı evin bir otağının yanar konstruksiyaları və dam örtüyü alovlanıb.
Həmçinin Şəkinin Baltalı kəndində ümumi sahəsi 168 m² olan kürsülü, birmərtəbəli evin dəmirdən ibarət dam örtüyünün taxta atmaları, bir otağının tavanı, bitişik köməkçi tikilinin yanar konstruksiyaları yanıb.
Astara rayonunun Şahağac kəndində isə ümumi sahəsi 150 m² olan birmərtəbəli üç otaqlı evin bir otağının yanar konstruksiyaları və dam örtüyü alovlanıb.
Bununla yanaşı, paytaxtın Yasamal rayonunda sahəsi 68 m² olan şüşə sexinin yanar konstruksiyaları yanıb. Yüksək temperaturdan sahəsi 9 m² olan mağazanın tavanı və sahəsi 34 m² olan kafenin tavanı əriyib.
Sözügedən yanğınlar söndürülüb.
