Yerlərdə təhsil qurumlarına direktor təyinatı artıq Təhsil Nazirliyi tərəfindən icra olunacaq. Bugün ölkədə 500 direktor vəzifəsi boşdur. Bunu dekabrın 21-də təhsil naziri Emin Əmrullayev keçirdiyi brifinqdə deyib
Həmçinin nazir regional təhsil idarələrinin artıq iqtisadi rayonlar üzrə yaradılmasını bildirib: “Bu, yerlərdəki təhsil şöbələrinin ləğvi demək deyil. Onlar sadəcə yeni yaradılacaq idarələrin tərkibində bir sektor kimi fəaliyyətlərini davam etdirəcəklər".
Qurumun rəhbəri qeyd edib ki, rayon təhsil şöbəsində çalışanlar işsiz qalmayacaq və onlar həmin şöbələrdə dövlət qulluğunda daimi müqavilə ilə çalışırdılarsa, yeni strukturda işlə təmin olunacaqlar.
“Yeni idarələr imkan verəcək ki, təhsil fəaliyyəti vahid formada olsun. Bu gün təhsil sistemi müəyyən səbəbdən mərkəzləşdirilmiş şəkildə fəaliyyət göstərir. Saat bölgüsü məktəb rəhbərliyi və ya regional təhsil idarələrinin rəhbərləri tərəfindən həyata keçirilməlidir", - deyə Emin Əmrullayev vurğulayıb.
Təhsil naziri, həmçinin jurnalistin övladı ilə bağlı məktəbdə baş verən qalmaqala münasibət bildirib. O, müəllimin bilmədən oğlan şagirdini qız kimi təqdim etdiyini deyib: “Həmin müəllim illərin təhsil işçisidir və savadlı kadrdır. İzahatında da qeyd etmişdir ki, şagirdi bilmədən saçının uzun olduğuna görə elə təqdim edibmiş”.
Qeyd edək ki, hadisə bir müddət əvvəl jurnalist Röya Rəfilinin övladı ilə bağlı baş verib. Bakıdakı 116 nömrəli tam orta məktəbdə sinifə yeni gələn oğlan şagirdin saçının uzun olduğuna görə müəllimə onu digər uşaqlara qız kimi təqdim etmişdir.
