Şirin Vəli oğlu Mirzəyev 5 yanvar 1947-ci ildə Xankəndi şəhərində anadan olub. O, Xankəndidə Nizami Gəncəvi adına 4 saylı orta məktəbi bitirib. Mirzəyev Bakıdakı Daxili Qoşunlar alayında xidmətini başa çatdırdıqdan sonra, 1967-ci ildə Leninqrad (indiki Sankt-Peterburq) şəhərindəki Ali Siyasi Hərbi məktəbinə qəbul olub və 1971-ci ildə təhsilini bitirərək təyinatla İrəvana göndərilib. O, beş il burada xidmət etdikdən sonra, Bakıya qayıdıb.
Şirin Mirzəyev Daxili Qoşunlar alayında 15 il xidmət göstərib. Sonra isə o, Moskva Ali Siyasi Akademiyasına qəbul olub, 1988-ci ildə isə həmin müəssisəni bitirib. O, rota komandirinin müavini, batalyon komandirinin müavini, diviziya komandirinin müavini vəzifələrinə qədər yüksəlib.
Qarabağ münaqişəsi başlayanda, Mirzəyev raport yazaraq döyüş bölgəsinə göndərilməsini xahiş edib. 1991-ci ilin oktyabrında polkovnik-leytenant respublikada ilk nizami özünümüdafiə batalyonunu yaradıb. 28 mart 1992-ci ildə Şirin Mirzəyevin və onun tərəfdarlarının səyi nəticəsində respublikada birinci tabor yaradılıb və o, Ağdam rayon ərazi özünümüdafiə taborunun komandiri seçilib.
1992-ci il iyun ayının əvvəllərində komandir öz dəstəsilə Xaçınçay boyunca irəliləyərək, Qazançı kəndini düşməndən azad edib. Mirzəyev əlavə plan hazırlayaraq, iyunun 12-də Sırxavənd kəndini nəzarət altına alıb. O, 18 iyun 1992-ci ildə Bakıya gəlib rəhbərliklə danışıq apardıqdan sonra, yenidən Qaralar kəndinə yola düşüb. Lakin Mirzəyev geri qayıdarkən içərisində olduğu maşın minaya düşüb. O, iki yaxın qohumu ilə birlikdə şəhid olub. Mərhum 20 iyun 1992-ci ildə Bakı şəhərində Şəhidlər xiyabanında dəfn edilib.
16 sentyabr 1994-cü ildə sözügedən şəxsə “Azərbaycanın Milli Qəhrəmanı” adı verilib. Hazırda Bakının Nizami rayonunda onun adını daşıyan küçə var. Xidmət etdiyi 836-cı hərbi hissənin həyətində şəhidin abidəsi qoyulub.
