1991-ci ilin bugünü Xocavənd rayonunun Qarakənd kəndində Azərbaycanın rəsmi şəxslərinin olduğu "Mi-8" helikopteri erməni silahlıları tərəfindən vurulmuşdur.
Nəticədə helikopterdə olan 22 nəfərin hamısı həlak olub. Vəfat edənlərin sırasında Azərbaycanın baş prokuroru, sabiq daxili işlər naziri və digər dövlət xadimləri, jurnalistlər, habelə Rusiya-Qazaxıstan sülhməramlıları da olub. Onlar Xocavənd rayonunun erməni birləşmələri tərəfindən hücuma məruz qalmasını aydınlaşdırmaq üçün yaradılmış komissiyanın üzvləri idilər.
İlkin ehtimala əsasən, qəza səbəbi helikopterin dumana görə qayaya çırpılması idi. Lakin sonradan onun vurulma faktı təsdiqlənmişdir.
Faktla bağlı 1991-ci ildə Azərbaycanın Hərbi Qarnizon Prokurorluğu tərəfindən cinayət işi açılsa da, hadisənin baş verdiyi ərazinin işğal altında olması səbəbindən istintaq dayandırılmışdır.
Hadisənin bir sıra məqamlarına hələ də aydınlıq gətirilməyib.
Vurulmuş helikopterin "qara qutusu" Azərbaycan hakimiyyəti tərəfindən Moskvaya təhvil verilmiş və tezliklə onun yandığı bildirilmişdir.
Faciə ilə əlaqədar Azərbaycanda üç günlük matəm elan edilmişdir.
