Bugün, dekabrın 10-dan Respublika fənn olimpiadalarına elektron qeydiyyat başlayır. Bu barədə Təhsil Nazirliyi məlumat verib.
İştirak etmək istəyən şagirdlər portal.edu.az platformasında qeydiyyatdan keçərək “Müsabiqə və olimpiadalar” bölməsinə daxil olmalıdırlar.
Yarışa IX, X və XI sinif şagirdləri, eləcə də xüsusi istedada malik 8-ci sinif şagirdləri qoşula bilərlər. Lakin 8-ci sinif şagirdlərinin qeydiyyatı yerli təhsil idarəetmə orqanlarının Təhsil İnstitutuna təqdimatı əsasında həyata keçirilir.
Qeydiyyat və sorğuların qəbulu 20 dekabr tarixinədək davam edəcək.
Daha sonra, 25-30 dekabr tarixlərində iştirakçıların imtahan mərkəzləri üzrə yerləşdirilməsi, 5-10 yanvar tarixlərində isə buraxılış vərəqələrinin yüklənilməsi həyata keçiriləcək.
Respublika fənn olimpiadaları riyaziyyat, informatika, fizika, kimya, biologiya, coğrafiya, tarix, Azərbaycan dili və ədəbiyyat fənləri üzrə keçirilir.
