Bugün, dekabrın 17-də terrorçuluqda təqsirləndirilən iki Ermənistan vətəndaşı – Sarqsyan İşxan Aşotinin və Rafaelyan Vladimir Otarinin məhkəməsi baş tutub.
Onlara dövlət hesabına vəkil təyin edilib. Vəkil təqsirləndirilən şəxslərin əllərindən dəmir qandalların məhkəmə prosesi zamanı açılmasını xahiş edib. O, işlə tanış olmaq üçün məhkəmədən ittiham aktının surətini və hazırlıq iclasının təxirə salınmasını istəyib. Məhkəmə prosesində 1 saat fasilə elan olunub.
Fasilədən sonra təqsirləndirilən şəxslərin əlləri açılıb. Məhkəmə baxışı dekabrın 24-nə təyin edilib.
Qeyd edək ki, sözügedən şəxslər “terrorçuluq”, “qanunsuz silah əldə etmə” və “təxribat törətmə” maddələri ilə ittiham edilir.
***
09:41
Bugün, dekabrın 17-də terrorçuluqda təqsirləndirilən iki Ermənistan vətəndaşı – Sarqsyan İşxan Aşotinin və Rafaelyan Vladimir Otarinin məhkəməsi keçiriləcək. Bu haqda APA məlumat yayıb.
Gəncə Ağır Cinayətlər Məhkəməsində keçiriləcək prosesdə təqsirləndirilənlərin anket məlumatları dəqiqləşdiriləcək və məhkəmənin baxış iclası təyin ediləcək.
Hər iki şəxs “terrorçuluq, odlu silahdan və silah qismində istifadə olunan predmetlərdən istifadə etməklə törədildikdə” maddəsi ilə ittiham edilir.
Qeyd edək ki, məhkəmə prosesi dekabrın 14-də baş tutmalı idi. Lakin ittiham olunanların məhkəməyə gətirilməməsinə görə proses təxirə salınmışdır.
