Suraxanıda və Abşeronda narkotiklərin təsiri altında avtomobil idarə edən daha iki sürücü aşkar edilib. Bu haqda dekabrın 18-də Daxili İşlər Nazirliyi məlumat yayıb.
Belə ki, Hövsan qəsəbəsinin sakini “rent a car”dan götürdüyü “KİA” markalı avtomobili idarə edərkən saxlanılıb. Sorğu zamanı sürücü heroin qəbul etdiyini etiraf edib. Ekspertiza zamanı onun sükan arxasında narkotik vasitələrin təsiri altında olduğu sübuta yetirilib.
Bundan başqa, Abşeron rayonu ərazisində əvvəllər məhkum olunmuş Siyəzən rayon sakininin idarə etdiyi “Khazar” markalı avtomobil saxlanılıb. Şəxsi axtarış zamanı onun üzərindən marixuana aşkar edilərək götürülüb.
Sözügedən şəxslər barəsində İnzibati Xətalar Məcəlləsinin müvafiq maddəsi ilə protokollar tərtib olunub.
Baş Dövlət Yol Polisi İdarəsinin hesabatına əsasən, cari ilin 9 ayı ərzində ölkədə narkotik vasitələrin təsiri altında avtomobil idarə edən 650 sürücü aşkar edilib.
