Cari ilin birinci rübündə Azərbaycanda 8,3 milyon tondan çox neft (kondensatla birlikdə) və 11,8 milyard kubmetr təbii qaz hasil edilib. Hesabat dövründə 6,7 milyon tona yaxın neft və 5,9 milyard kubmetr qaz ixrac edilib. Bu barədə 26 aprel tarixində Energetika Nazirliyi məlumat verib.
Respublika üzrə neft hasilatının 5,3 milyon tonu “Azəri-Çıraq-Günəşli” (AÇG) nin, 1,1 milyon tonu (kondensat) “Şahdəniz”in payına düşüb. SOCAR üzrə neft (kondensatla birlikdə) hasilatı 1,9 milyon ton təşkil edib. Hasil edilən qazın 3,5 milyard kubmetri AÇG-dən, 6,4 milyard kubmetri “Şahdəniz”dən, 1,9 milyard kubmetri SOCAR üzrə hasil edilib.
Qeyd edək ki, “AÇG” və “Şahdəniz” yataqları istismara veriləndən 1 aprel 2022-ci il tarixinədək 587 milyon tondan çox neft (kondensatla birlikdə) və 357 milyard kubmetr təbii qaz hasil edilib.
