2022-ci ilin üçüncü rübündə Heydər Əliyev adına Bakı Neft Emalı Zavodunda (NEZ) “AVRO-5” standartına uyğun olan dizel yanacağının istehsalına başlamaq planlaşdırılır. Bu barədə 3 iyun tarixində “SOCAR Downstream” şirkətinin baş direktorunun müavini Emil Alxaslıya istinadən APA xəbər verib.
Şirkət rəsmisinin sözlərinə görə, 2023-cü ilin iyun-iyul aylarına isə benzinin istehsalına başlanılması planlaşdırılıb. O əlavə edib ki, NEZ-də ildə 2 milyon ton avtomobil benzini istehsal ediləcək. Bunun 60%-i Aİ-92 markalı benzinin, 40%-i isə Aİ-95 markalı benzinin payına düşəcək. Artıq qalan yanacaq həcmləri ixraca yönəldiləcək.
Qeyd edək ki, rekonstruksiya və modernləşdirmə layihəsinin birinci mərhələsinin 2023-cü ildə, ikinci mərhələsinin isə 2027-ci ildə bitəcəyi planlaşdırılır. Rekonstruksiyadan sonra NEZ bütün Xəzər dənizi ölkələrinin neftini emal edə biləcək.
