Oktyabrın 20-də dələduzluqda təqsirləndirilən sabiq hakim Lətif Nəbiyev 8 il müddətinə azadlıqdan məhrum edilib və Bakı Ağır Cinayətlər Məhkəməsi zalında həbs olunub. Bu barədə APA məlumat verib.
İttiham olunan şəxs Rüstəm Abdullayevdən şərikli iş qurmaq adı ilə 59 min 700 dollar alıb.
Həmçinin L.Nəbiyev aldadaraq qohumu Azad İbrahimovdan Bakıda dəniz kənarında torpaq almaq məqsədi ilə 247 min 500 dollar alıb.
“Mən Türkiyədə olanda pul göndərdim ki, torpaq alsın. Buzovnada, Bilgəhdə dəniz kənarında torpaq alacaqdı. Lətif Nəbiyev qardaşımın bacanağıdır. Amma istintaqda deyib ki, guya pulu ona yox, rəhmətlik qardaşım Abbasa göndərmişəm. Amma yalan deyir. Aramızda telefon danışıqları var”, - deyə Azad İbrahimov qeyd edib.
Ona Cinayət Məcəlləsinin “dələduzluq” maddəsi ilə ittiham verilib.
Məlumata əsasən, Lətif Nəbiyev Bakı Apelyasiya Məhkəməsinin və Suraxanı rayon Məhkəməsinin hakimi olub. O, vəzifə səlahiyyətlərindən istifadə etməklə korrupsiyaya yol verdiyinə görə 2008-ci ildə Prezidentin Sərəncamı ilə hakimlikdən uzaqlaşdırılıb.
