Payızlıq əkinlərin Elektron Kənd Təsərrüfatı İnformasiya Sistemində (EKTİS) bəyan edilməsi ilə əlaqədar növbəti tədbir Göyçay, Ağdaş və Ağsu rayonlarında keçirilib. Bu haqda 26 noyabr tarixində Kənd Təsərrüfatı Nazirliyi məlumat verib.
Tədbir çərçivəsində fermerlər məlumatlandırılıblar ki, payızlıq əkinlərinin dövlət tərəfindən subsidiyalaşdırılması üçün fermerlər əkdiyi məhsulları EKTİS-də vaxtında bəyan etməlidirlər.
Həmçinin qeyd edilib ki, payızlıq əkinlərin bəyanına sentyabrın 1-dən start verilib və bu proses dekabrın sonunadək davam edəcək. Sahibkarlar öz əkin məlumatlarını EKTİS-də nə qədər tez bəyan etsə, ilin əvvəlində bir o qədər tez əkin subsidiyası almaq imkanı qazanır.
Kənd Təsərrüfatı Nazirliyinin payızlıq əkinlərin bəyan edilməsi ila bağlı növbəti məlumatlandırma sessiyası Yevlax, Ucar və Kürdəmir rayonlarında keçiriləcək.
Fermerlər eagro.az saytı vasitəsilə onlayn şəkildə və ya Dövlət Aqrar İnkişaf Mərkəzlərinə, Regional ASAN xidmət mərkəzlərinə müracət edib payızlıq əkinlərini bəyan edə bilərlər.
