Azərbaycan Ombudsmanı Səbinə Əliyeva Ermənistan tərəfindən işğal dövründə dağıdılmış qəbiristanlıqlarla bağlı faktaraşdırıcı missiyalar həyata keçirir. Bu barədə dekabrın 20-də Ombudsman Aparatı məlumat verib.
Məqsəd işğal altında olmuş ərazilərdə Ermənistan tərəfindən azərbaycanlılara məxsus qəbirlərin qəsdən dağıdılması hallarını və hüquq pozuntularını müəyyənləşdirərək beynəlxalq ictimaiyyətə çatdırmaqdır.
Faktaraşdırıcı missiya Füzuli şəhərində və rayonun Qaraxanbəyli, Dədəli, Kürdlər kəndlərindəki qəbiristanlıqlardan başlanılıb. Həmin qəbiristanlıqların dağıdıldığı aşkar edilib. Daha sonra isə Zəngilan rayonunun Məmmədbəyli və Ağalı kənd qəbiristanlıqlarından sübutlar toplanılıb.
Ermənistan tərəfindən həmin qəbiristanlıqlardakı məzarlar dağıdılmaqla yanaşı, həm də ərazi minalanıb.
Məlumata görə, toplanılmış məlumatlar beynəlxalq təşkilatlara təqdim ediləcək.
