Azərbaycanda südlük inək və camışlarla yanaşı, qoyun və keçilərin də güzəştli sığortasına başlanılıb. Bu haqda 6 yanvar tarixində Aqrar Sığorta Fondunun saytında məlumat verilib.
Belə ki, 11-ci gündən 5 yaşa qədər olan qoyun və keçilər sığorta ediləcək. Həm xaricdən gətirilən cins, həm də yerli heyvanları sığortalamaq mümkün olacaq. Fermerlər sığorta haqqının yalnız 50%-ni ödəyəcək, pulun qalan hissəsi isə dövlət tərəfindən ödəniləcək.
Sığortalanan qoyun və keçilər peyvəndlənməli, birkalanmalı, EKTİS-də qeydiyyata alınmalıdırlar. Həmçinin onların saxlanılması və qidalanması qaydalara uyğun olmalıdır.
Sığorta zərfinə yoluxucu xəstəliklər, təbii fəlakətlər, zəhərlənmə, vəhşi heyvanların hücumu, təbii fəlakətlər və yanğın, oğurluq və digər hallar aiddir.
Azadolmadan asılı olaraq sığorta tarifi dəyişir. Belə ki, azadolma məbləği 10% olduqda, sığorta tarifi 7%, azadolma məbləği 20% olduqda sığorta tarifi 6,4% təşkil edir.
