ABŞ-ın Florida ştatında yerləşən Nova Cənub-Şərqi Universitetinin psixologiya ixtisası üzrə təhsil alan həmyerlimiz Nabat Eminovanın təşəbbüsü ilə Azərbaycan-Amerika Gənclər Təşkilatı yaradılıb. Bu haqda dekabrın 21-də Report məlumat yayıb.
Təşkilat Azərbaycan-Amerika Mədəniyyət Assosiasiyasının nəzdində yaradılıb və Floridanın Tallaxassi şəhərində rəsmi qeydiyyatdan keçib.
Məqsəd beynəlxalq aləmin diqqətini Azərbaycan həqiqətlərinə cəlb etmək, ştatın ictimai-siyasi və mədəni həyatında daha fəal şəkildə iştirak etməkdir. Həmçinin əsas fəaliyyət planları arasında ölkəmizə dost münasibət bəsləyən xalqların gəncləri ilə əlaqələrin genişlənməsi də var.
“Layihələrdə amerikalı və azərbaycanlı gənclər birlikdə işləyəcəklər. Uğurlu layihələrə imza atmağı planlayırıq. Tələbə və gənclərin iştirakı ilə keçirilən tədbirlərin ABŞ mediasında işıqlandırılması təşkilatın əsas prioritetlərindən biridir”, - deyə həmyerlimiz vurğulayıb.
