Yanvarın 30-da 2 saylı Gəncə regional “ASAN xidmət” Mərkəzinin açılışı baş tutub. Bu haqda president.az məlumat yayıb.
Açılışda Azərbaycanın Prezidenti İlham Əliyev iştirak edib. Bu Mərkəz ölkə üzrə sayca iyirmi ikincidir. Burada vətəndaşlara müxtəlif dövlət qurumları, həmçinin özəl şirkət və müəssisələr tərəfindən 320-dən çox xidmət göstəriləcək.
Gəncə şəhəri, Şəmkir, Gədəbəy, Göygöl, Goranboy, Samux, Naftalan, Kəlbəcər və Xocalı rayonlarını əhatə edən bu bölgədə qeydiyyatda olan 1 milyon insan var. Buna baxmayaraq, Mərkəz ərazi məhdudiyyəti olmadan çalışacaq.
Bildirilib ki, Mərkəzdə işçilərin sayı 40 nəfər təşkil edəcək. Onlar ,əsasən, şəhid ailələrinin üzvləri, qazilər və könüllülər olacaq.
Dövlət başçısı, həmçinin Gəncədə Dövlət Dram Teatrının yeni binasının açılışında iştirak edib. Bu teatrın yeni binasının təməli 2014-cü ildə qoyulub. Burada 478 yerlik böyük tamaşaçı zalı, 22 tamaşaçı yerlik lojalar və 120 yerlik kiçik tamaşaçı zalı var.
Qeyd edilənlərlə yanaşı, ölkə rəhbəri şəhərdə Memorial Kompleksinin təməlini də qoyub. Vətən müharibəsi dövründə Gəncə 4, 5, 8, 11 və 17 oktyabr tarixlərində Ermənistan tərəfindən raket hücumuna məruz qalıb. Nəticədə 6-sı uşaq olmaqla, 26 mülki şəxs həlak olub.
[URIS id=28970]
