Azərbaycan Auditorlar Palatasının Gəncə şəhər Auditor təşkilatının sabiq direktoru Natiq Məmmədova hökm oxunub. O, 10 il müddətinə azadlıqdan məhrum edilib. Bu haqda martın 10-da Report məlumat yayıb.
Sözügedən şəxs 2020-ci ilin sentyabrında Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanılıb. Onun 2012-ci ilin fevralında Müəllimlər İnstitutunun yoxlanılması zamanı oranın direktorundan 400 min manatı rüşvət qismində aldığı məlum olub.
Eyni zamanda, vətəndaş 2014-cü ilin may ayında “Finca Azərbaycan” Qeyri Bank Kredit Təşkilatına məxsus olan 15 min 600 manat pulu ələ keçirib. Bundan əlavə, təqsirləndirilən şəxs bir nəfərin Fövqəladə Hallar Nazirliyində işlə təmin olunması müqabilində ondan 7 000 manat pul tələb edib.
N.Məmmədov “xeyli miqdarda ziyan vurmaqla dələduzluq etmə”, “rüşvət alma hədə-qorxu tətbiq olunmaqla törədildikdə”, “vəzifə saxtakarlığı” və başqa maddələrlə ittiham edilib.
