Son dövrlər daşıyıcı şirkətlər vasitəsilə Azərbaycana gətirilən yüklərin içərisində şəxsi istifadə adı altında bəyan edilən mallardan kommersiya təyinatlı malların aşkar edilməsi və qaçaqmalçılıq faktları artıb. Bu barədə aprelin 22-də Dövlət Gömrük Komitəsi məlumat yayıb.
Ötən ilin 3 ayı ərzində 7 belə fakt müəyyən edilmişdisə, bu ilin eyni dövründə 4 dəfə çox - 29 belə fakt müəyyən edilib. Eyni zamanda, onlayn sifariş əsasında daşınması həyata keçirilən bağlamalarda verilən limit məbləğindən sui-istifadə halları artıb.
Bu kimi faktlara misal olaraq, ayaqqabı yükü kimi qeyd edilən bağlamaya gömrük baxışı zamanı ayaqqabının içindən 200 min manata yaxın dəyərində brilyant qaşlar aşkar edilib.
Digər poçt daşıma şirkəti tərəfindən gətirilən geyim əşyalarının içərisindən “Samsung” markalı mobil telefonlar, həmçinin “Maska paketi” yükləri kimi bəyan edilən bağlamanın içərisindən qızıl-zinət əşyaları aşkarlanıb.
Bundan əlavə, 146 ədəd bağlamaya aid qiymət məlumatları faktiki yuxarı həddə olmağına baxmayaraq, “1” türk lirəsi qeyd edilib. Bu da öz növbəsində aylıq limit məbləğinin düzgün hesablanmasına mane olur.
Dövlət Gömrük Komitəsi vətəndaşları qanunvericiliyə riayət etməyə və bəyannamədə mallara dair məlumatları düzgün göstərməyə çağırıb.
