Bakıda dekabrın 19-da inzibati vəzifələrin B növünə aid olan BA və BB qruplarına uyğun olan vəzifələr üzrə dövlət qulluğuna qəbul olmaq üçün test imtahanları keçiriləcək. Bu haqda Dövlət İmtahan Mərkəzi (DİM) məlumat yayıb.
1903 nəfərin iştirak edəcəyi imtahan saat 11:00-da başlayacaq və 3 saat davam edəcək. Saat 10:45-dən sonra gələn namizədlər imtahana buraxılmayacaq.
Qiymətləndirmədə iştirak etmək üçün namizədlər DİM-in saytına daxil olaraq “İmtahana buraxılış vərəqəsi”ni çap etməlidirlər. Həmçinin saytda iştirakçılara “Namizədin yaddaş kitabçası” təqdim olunur. Kitabçada imtahan prosesi ilə bağlı tövsiyələr, onların əməl etməli olduqları qaydalar və digər zəruri məlumatlar qeyd olunur.
Namizədlər imtahana şəxsiyyəti təsdiq edən sənədin əslini, imtahana buraxılış vərəqəsini və imtahan iştirakçısının sağlamlığı haqqında bəyannaməni gətirməlidirlər.
