Şirvanda elektron qolbaq daşıyan şəxs narkotik satarkən polis tərəfindən saxlanılıb. Bu haqda dekabrın 17-də Daxili İşlər Nazirliyindən məlumat verilib.
Belə ki, sözügedən şəxs şəhər ərazisində yerləşən "Oazis" restoranının qarşısında saxlanılıb. Onun üzərinə keçirilən baxış zamanı heroin aşkar edilərək götürülüb. Şirvan sakini əvvəllər də narkotik vasitələrin qanunsuz dövriyyəsi ilə məşğul olduğu üçün tutulmuşdur və elektron qolbaqla təchiz olunmuşdur.
Analoji hadisə bugün Oğuzda da baş verib. Elektron qolbaq daşıyan Kərimli kənd sakinindən sellofan torbada qurudulmuş marixuana tapılıb.
Bu ilin 11 ayı ərzində narkotik vasitələrin qanunsuz dövriyyəsi ilə bağlı 8095 cinayət faktı aşkarlanıb. Ümumilikdə 6 ton 582 kiloqram narkotik müsadirə olunub.
