Kürdəmirdə 3 il əvvəl baş verən Atakişili kənd sakinin qətlinin üstü açılıb. Cinayətkarın kim olduğu məlum olub. Bu haqda dekabrın 17-də Baş Prokurorluq və Daxili İşlər Nazirliyi birgə məlumat yayıb.
Belə ki, 2018-ci ildə mərhumun qonşusu Rafael Cəfərov aralarında yaranan mübahisə zamanı onu əvvəlcə əli ilə vurub, sonra isə bıçağa bənzər alətlə sol yuxarı sinə nahiyyəsinə ardıcıl zərbələr endirib. Qonşusunun öldüyünə əmin olduqdan sonra o, törətdiyi cinayəti gizlətmək üçün meyiti içərisi su ilə dolu kollektora atıb.
Prokurorluq və polis əməkdaşları tərəfindən həmin kollektora baxış keçirilərkən bir neçə skelet sümükləri aşkar olunub. Ekspertiza vasitəsilə onların mərhuma məxsus olmaları müəyyən edilib.
Sözügedən şəxs “köməksiz vəziyyətdə olan adamı öldürmə”, “təkrarən qəsdən adam öldürmə” və “zərərçəkmiş şəxsin üzərindən və ya digər əl yükündən çıxarılmaqla oğurluq” maddələri ilə ittiham olunub. Cinayət işi üzrə istintaq-əməliyyat tədbirləri davam edir.
Azərbaycanda 2021-ci ilin birinci yarısında 15 minə yaxın cinayət hadisəsi baş verib. Onlardan qəsdən adam öldürmə və adam öldürməyə cəhdlərin sayı 109 təşkil edib.
