Bu ilin yanvar-fevral aylarında Bakıda müntəzəm marşrut xətləri üzrə 80,7 milyon sərnişin səfəri qeydə alınıb. Bu barədə Bakı Nəqliyyat Agentliyi məlumat verib.
Məlumata əsasən, sözügedən dövr ərzində paytaxta 62 ədəd yeni avtobuslar gətirilib. Bundan əlavə, iki ay ərzində 94 nəfər sürücü Agentliyin Sürücü Təlim Mərkəzində təlimlərə cəlb edilib. Təlimi uğurla başa vuran sürücülərin hamısı “BakuBus” MMC-də işlə təmin edilib.
Həmçinin Bakıdakı küçə və prospektlərdə 85 yeni eynisəviyyəli piyada keçidi təşkil edilib və 406 piyada keçidinin boyaları yenilənib. Onlardan 6-da “sarı döyünən işıq” tətbiq edilib. Agentlik tərəfindən 1 200-ə yaxın yol nişanı quraşdırılıb. Məlumatda qeyd olunub ki, 51 ünvanda avtobus dayanacaq məntəqəsi təşkil edilib.
