Ələt qəsəbəsində sürücünün yol qəzasını narkotikin təsiri altında törətdiyi məlum olub. Hadisə nəticəsində 9 nəfər yaralanıb. Bu haqda dekabrın 18-də Baş Dövlət Yol Polisi İdarəsi məlumat verib.
Tibbi müayinə zamanı “Ford Transit” markalı mikroavtobusun sürücüsü Cəmşid İsmayılovun marixuanadan istifadə etdiyi bilinib.
Həmçinin müəyyən edilib ki o, yol hərəkəti qaydalarını pozub başqa şəxslərin sağlamlığına zərər vurduğuna görə 2011-ci və 2013-cü illərdə cinayət məsuliyyətinə cəlb edilib.
Qeyd edək ki, sözügedən insident dekabrın 17-də Bakı-Qazax-Gürcüstan sərhədi avtomobil yolunun Ələt qəsəbəsindən keçən 61-ci kilometrliyində qeydə alınıb. Xəsarət alanlardan ikisi azyaşlıdır. Onlardan birinin vəziyyəti ağırdır.
