Bu il Azərbaycanda 45 milyard kubmetr qazın hasilatı gözlənilir. Onun 19 milyardı ixraca, qalan hissəsi isə daxili tələbata və lay təzyiqini saxlamaq üçün neft laylarına yenidən qazın vurulmasına gedəcək. Bunu ölkə başçısı 12 yanvar tarixində televiziya kanallarına müsahibəsində deyib.
İlham Əliyev bildirib ki, qazın 8 milyarddan çoxu Türkiyə, 7 milyarddan çoxu İtaliyaya ixrac olunacaq. Qalanı isə Gürcüstan, Bolqarıstan, Yunanıstan arasında bölünəcək.
Həmçinin o əlavə edib ki, gələcəkdə Abşeron qaz yatağı istismara veriləcək, Ümid, Babək, Asiman yataqları tədricən işlək vəziyyətə getiriləcək. “Bu, ölkəmizə əlavə vəsait gətirəcək və Avropa İttifaqı-Azərbaycan əlaqələrində bundan sonra da mühüm rol oynayacaq”, - deyə dövlət rəhbəri vurğulayıb.
