Cənubi Qafqazda sülhün bərqərar olması üçün Ermənistan Azərbaycanın ərazi bütövlüyünü tanımalıdır. Bunu Azərbaycan Prezidenti İlham Əliyev yanvarın 12-də yerli televiziya kanallarına müsahibəsində deyib.
O vurğulayıb ki, tərəflər arasında sülh müqaviləsi imzalanarsa, orada mütləq hər iki ölkənin bir-birinin ərazi bütövlüyünü tanıması müddəası olmalıdır: “Əgər Ermənistan ərazi bütövlüyümüzü tanımaq istəmirsə, o zaman biz də onların ərazi bütövlüyünü tanımayacağıq”.
Ölkə başçısı qeyd edib ki, Ermənistanı tanımamaq üçün Azərbaycanın daha çox əsası var: “1920-ci ilin noyabr ayında tarixi torpağımız Zəngəzur Ermənistana birləşdirilib, daha əvvəl isə İrəvan şəhəri 29 may 1918-ci ildə Ermənistana verilib”.
Eyni zamanda İlham Əliyev Azərbaycan ərazisində müvəqqəti yerləşdirilən Rusiya sülhməramlılarının fəaliyyətindən də danışıb. Prezident bildirib ki, sülhməramlılar öz üzərlərinə düşən vəzifələrinin öhdəsindən gəlsələr də, Azərbaycanın onlara qarşı haqlı iddiaları var: “Biz dəfələrlə Azərbaycan ərazisinə qanunsuz səfərlər baş verdikdə rəsmi qaydada Rusiya tərəfinə irad bildirmişik”. İlham Əliyev onu da əlavə edib ki, rəsmi Bakı sülhməramlıların məsuliyyət zonasına giriş-çıxışda həm Xankəndidə, həm ətraf bölgələrdə baş verən bütün hadisələrdən xəbərdardır.
Müsahibənin tam mətni ilə Prezidentin rəsmi səhifəsində tanış olmaq olar.
