Ötən il oktyabrın 13-də, Vətən müharibəsinin 17-ci günü Prezident İlham Əliyev Türkiyənin “Haber Türk” televiziya kanalına müsahibə verib.
Gəncənin Ermənistan tərəfindən atəşə tutulmasını şərh edərkən ölkə başçısı terrorun qisasının döyüş meydanında olacağını bildirmişdir: ”Biz heç zaman mülki şəxslərə qarşı heç bir addım atmırıq və bizim bütün hədəflərimiz hərbi hədəflərdir. Bu, Ermənistanın növbəti terror aktıdır. Ancaq bu terror aktı Azərbaycan xalqının iradəsini qıra bilməz. Biz düşmənə qarşı daha böyük əzmlə, iradə ilə vuruşacağıq və torpaqlarımızı azad edəcəyik. Azərbaycan bayrağı işğal edilmiş bütün torpaqlarda qaldırılacaq”.
“Mən inanmıram ki, hər hansı bir ölkə Dağlıq Qarabağın müstəqilliyini tanısın. Çünki bundan heç bir saat keçməmiş bu ölkə ilə biz bütün diplomatik əlaqələrimizi kəsərik. Bu, mütləqdir”, - deyə İlham Əliyev erməni diasporunun Dağlıq Qarabağın müstəqilliyinin tanınması üçün səyləri barədə suala cavab verib.
Həmin gün “BBC” və “France-24” telekanalları Ermənistanın Gəncəyə raket hücumu ilə bağlı reportaj yayımlayıb. Reportajlarda Ermənistanın raket hücumu nəticəsində yaxınlarını itirmiş insanların və dağılmış evlərin görüntüləri təqdim edilib.
Həmçinin oktyabrın 13-də Azərbaycan Müdafiə Nazirliyi işğaldan azad edilən Hadrut qəsəbəsinin videogörüntüsünü yayıb.
