Azərbaycan Prezidenti İlham Əliyev dekabrın 14-də Brüsseldə İspaniyanın “El Pais" qəzetinə müsahibə verib. Bu barədə dövlət başçısının səhifəsində məlumat yerləşdirilib.
İlham Əliyev postmünaqişə dövründə Ermənistanla əldə edilən əlaqələrdən bəhs edib:
“Azərbaycan və Ermənistan arasında dəmir yolu əlaqəsinin açılması ilə bağlı tam razılıq var. Hazırda Bakıdan Naxçıvana uçan təyyarələr Ermənistan hava məkanından keçməyə başlayıb. İndi isə Zəngəzur dəhlizinin hüquqi rejimini müzakirə edirik”, - deyə ölkə rəhbəri qeyd edib.
Dövlət başçısının sözlərinə əsasən, indiki vəziyyət sabitdir, lakin qarşı tərəfdə hələ də revanşizm əlamətləri görünür: “Buna görə də onlar sərhəddə təxribatlar törətməyə cəhd göstərirlər”.
Müharibə əsirlərinə gəldikdə isə, Prezident 100-dən çox saxlanılan şəxsin azad edilib Ermənistana qaytarıldığını, cinayət törədənlərin isə mühakimə olunduğunu vurğulayıb.
Müsahibədə, həmçinin Azərbaycanın ixrac etdiyi qazdan danışılıb. İlham Əliyev bildirib ki, bu il artıq Avropa İttifaqına 7 milyard kubmetrdən çox təbii qaz ixrac edilib: “Gələn il biz 9 milyard kubmetr, 2023-cü ildə isə 11 milyard kubmetr qaz ixrac etməyi planlaşdırırıq".
